 |
| Jubanne PIGA |
 |
| SA COBERTA DE S'OPERA PREMIADA |
(Agilem, Nuoro)
SARDU > Su Prèmiu literàriu "Casteddu de sa Fae" de Pasada, fundadu in su 1979 dae s'artista pasadinu Màuru Deledda (1927-1989), a pustis de 10 annos, torrat in possa cun unu binchidore nou: Giuanne Piga, nugoresu, poete e iscritore famadu, connotu e pretziadu in totu sa Sardigna. Est suo su romanzu "Sa vida cuada", iscritu cunforma a sas normas de sa Lsc, chi at retzidu sa prèmiu dae sa Sotziedade Culturale Casteddu de sa Fae (SCCF), organizadora de custu cuncursu literàriu, in sa tzerimònia de premiatzione fata in Pasada su 16 de abrile, in su tzentru istòricu de sa bidda, in sa Domo de sa sas Damas, logu galanu e ammajadore e in tinu a su valore de su Prèmiu matessi.
Sa presentada l'at fata su segretàriu de sa sotziedade Ànghelu Canu, chi at ammentadu s'importu de su prèmiu pro su sardu, pro Pasada e pro totu sa Sardigna. Pustis, a faeddatu Roberto Tola, sìndigu sardista, atentzionadu mannu a su mundu de sa cultura e de sa limba sarda, chi at propostu de fàghere in cada bidda de s'ìsula una die intrea dedicada a sa Sardigna, a manera de tènnere cada annu nessi 377 manifestatziones in favore de sa terra nostra.
S'onore de dare su prèmiu est tocada a su Presidente de sa SCCF, Diegu Corràine, chi, a pustis de àere ammentadu sas punnas de su prèmiu e s'importu chi tenet una norma linguìstica pro sa literadura, e a s'imbesse una literadura pro sa norma —caminende ambas duncas a manu tenta—, at presentadu s'òpera binchidora e su nùmene de s'autore.
E s'artista Mimmo Bove, chi at sighidu, animadu e organizadu su Prèmiu dae su cumintzu, at creadu su sìmbulu de su Prèmiu, in terracota cun basamentu in ogiastru, e l'at cunsinnadu a su premiadu J. Piga.
Jubanne Piga si annanghet duncas a s'Olimpu de sa Literadura Sarda, a sos autores chi ant leadu parte a su Prèmiu e chi ant fatu s'istòria de sa cultura sarda de sos ùrtimos 40 annos: Mialinu Pira, Benvenutu Lobina, Giuanne Frantziscu Pintore, Larentu Pusceddu, Giosepe Tirotto, Palmiru de Giovanni, Giuanne Càralu Tusceri, Gonàriu Carta Brocca e àteros.
Su romanzu, comente resurtat in sa retrocoberta de s'òpera, "cumintzat in su 1984 e agabbat in su 2006: bintiduos annos de amore e de bisos, ma finas de contos mai contados e de veridades mai naradas, de babbos e de mamas, de fìgios e de fìgias. Famìlias a craru e famìlias mustrencas. E si a bortas sas vidas cuadas s'intritzint cun sas vidas connotas, àteras bortas sas vidas disigiadas non sunt sas vidas bìvidas…".
Pro s'ocasione, sa SCCF, comente organizadore e editore, at imprentadu petzi 100 còpias de proa (35 sunt giai istadas dadas). Ma, luego, a pustis de carchi curretzione e megioru, at a èssere publicada s'editzione definitiva, pro la presentare in Nùgoro, sa tzitade de su binchidore, e in totu sas àteras biddas de sa Sardigna.
Sos progetos imbenientes de su Casteddu de sa Fae sunt paritzos e de primore: —presentare dae inoghe a pagu tempus su bandu nou, pro s'ed. 2016, dedicada a sos Contos.
—pesare seminàrios de iscritura e de letura, pro animare a lèghere in sardu;
—organizare cunferèntzias de literadura sarda, tradutzione;
—acurtziare sos giòvanos a s'iscritura literària in sardu cun unu cuncursu o setzione riservada a issos.
Su bandu de su 2015 previdet finas un cuntributu a un'editore chi bortet e pùblichet s'òpera de Jubanne Piga in limba istràngia, diferente dae s'italiana.
[Diegu Corràine, Sotziedade Culturale Casteddu de sa Fae]
